ÍR gæti komið á óvart

Undanúrslitarimma Keflavíkur og ÍR í Úrvalsdeild karla í körfuknattleik hefst í dag. Fyrsti leikur liðanna er í Keflavík og liðið sem fyrr vinnur þrjá leiki kemst í sjálf úrslitin. Keflvíkingar hafa heimavallarréttinn í viðureigninni, eftir að hafa verið með bestan árangur allra liða í deildarkeppninni og kemur það til með að reynast liðinu mikilvægt í úrslitakeppninni því ár og dagar eru síðan liðið tapaði síðast á heimavelli. Fréttablaðið ræddi við Einar Bollason, körfuboltasérfræðing og fékk hann til að spá í spilin fyrir rimmuna. "Þessi viðureign verður athylisverð og ég held að þarna gætum við verið að horfa fram á óvænt úrslit. Ég held að ÍR-ingarnir eigi eftir að koma á óvart og vinna í Keflavík, gott ef þeir stela ekki fyrsta leiknum í Keflavík. Mér finnst vera eitthvað óvænt í skýjunum um þessar mundir, ekki síst eftir þessa frábæru fyrstu umferð þar sem þrjár af fjórum viðureignum fara í oddaleik og í fjórðu rimmunni urðu ein óvæntustu úrslit sem litið hafa dagsins ljós á síðustu árum. Ég er ekki frá því að þetta hafi verið skemmtilegasta fyrsta umferð sem ég hef séð í körfunni frá upphafi. Nú held ég bara að tími ÍR sé kominn og að þeir stimpli sig inn sem alvöru spútniklið. Þeir eru með skemmtilegt lið, frábæra Kana og ég held að ef að Gunnar Einarsson nær sér ekki alveg af meiðslum sínum sem hann hlaut á móti Grindavík, þá gætum við verið að horfa fram á að ÍR taki þetta. Þeir eiga eftir að veita Keflvíkingum mikla keppni í þessu einvígi og ef þeir ná að mótívera sig og eru nógu hungraðir gætum við verið að horfa fram á óvænta hluti. Ef Gunnar Einarsson hins vegar getur leikið af fullum krafti spái ég að Keflavík taki þetta í oddaleiknum á heimavelli 3-2, en þetta verða rosalegir leikir", segir Einar Bollason. Fyrsti leikur liðana verður háður í Keflavík klukkan 14 í dag.