Þriðji í röð hjá Keflavíkurstúlkum

Kvennalið Keflavíkur í körfubolta tryggði sér í gær Íslandsmeistaratitilinn með 13 stiga sigri á Grindavík, 70-57, í þriðja leik liðanna í lokaúrslitunm en þetta var þriðja árið í röð sem Keflavíkur vinnur úrslitaeinvígið 3-0. Alex Stewart, bandaríski leikstjórnandi Keflavíkurliðsins var valin besti leikmaður úrslitanna en hún skoraði 22,3 stig tók 9,3 fráköst og gaf 7,7 stoðsendingar að meðaltali í lokaúrslitunuum. Hún var himinlifandi þegar titilinn var í höfn. "Þetta er dásamleg tilfinning því þetta er líka í fyrsta sinn sem ég vinn titil og þetta er því mjög spennandi stund fyrir mig," sagði Alex eftir leikinn. "Þetta er ótrúlegt lið hér í Keflavík og ég gerði svo sem ekki mikið. Það var frábært að koma inn í svona gott lið og fá svona góðar móttökur," sagði Alex kát í leikslok en hún var langstigahæst hjá Keflavík í leiknum með 24 stig. Keflavík hafði frumkvæðið allan leikinn í gær og Grindavík komst aldrei yfir þótt að þær Rita Williams og Sólveig Gunnlaugsdóttir hafi haldið liðinu inn í leiknum með góðum leik. Hjá Keflavík var það enn og aftur liðsheildin sem gerði gæfumuninn í þessu einvígi. "Við mættum bara betra liði, þær voru tilbúnar frá fyrsta leik og neistinn var hjá þeim," sagði Henning Henningsson, þjálfari Grindavíkur. "Ég er búinn að læra heilmikið í vetur en ég er ekki ánægður með veturinn því ég tel að þetta lið hafi átt að ná betri árangri. Ég tek heilmikið á því á mig sjálfur," bætti Henning við. Stig Keflavíkur: Alex Stewart 24 (10 fráköst, 5 stoðs.), Svava Ósk Stefánsdóttir 9, Anna María Sveinsdóttir 8 (14 fráköst, 5 stolnir), Bryndís Guðmundsdóttir 8 (9 fráköst, 5 stoðs.), Birna Valgarðsdóttir 8, María Ben Erlingsdóttir 7, Rannveig Randversdóttir 6. Stig Grindavíkur: Rita Williams 24 (8 fráköst, 6 stoðs.), Sólveig Gunnlaugsdóttir 16 (8 fráköst), Svandís Sigurðardóttir 12 (10 fráköst, 5 stolnir), Ólöf Helga Pálsdóttir 4, Erla Reynisdóttir 2, Erla Þorsteinsdóttir 1.