Lottomatica Roma tapaði fyrir toppliðinu

Montepashi Siena er enn ósigrað á toppi ítölsku úrvalsdeildarinnar í körfubolta eftir sigur á Lottomatica Roma í gærkvöldi, 92-76.

Rómverjar deila nú öðru sæti deildarinnar með Angelico Biella en liðin hafa bæði unnið níu leiki en tapað fjórum. Siena er langefst enda ósigrað í þrettán leikjum.

Jón Arnór lék vel í leiknum og skoraði átta stig á sautján mínútum. Hann hitti úr einu af þremur skotum sínum innan þriggja stiga línunnar en nýtti bæði skotin sín utan hennar. Hann tók þar að auki tvö fráköst í leiknum.