Flottur leikur hjá Jóni Arnóri

Jón Arnór Stefánsson skoraði sextán stig þegar að lið hans, CAI Zaragoza, vann góðan sigur á Valladolid, 99-86, í spænsku úrvalsdeildinni í kvöld.

Jón Arnór spilaði í rúmar 30 mínútur og setti niður fjórar af fimm þriggja stiga tilraunum sínum í leiknum. Hann tók einnig tvö fráköst og gaf tvær stoðsendingar.

CAI Zaragoza er í sjöunda sæti deildarinnar og getur fátt komið í veg fyrir að liðið tryggi sér sæti í úrslitakeppninni í vor. Valladolid er í fimmtánda sæti.