Sex íslensk mörk í öruggum sigri Kiel

Kiel vann öruggan sigur á Flensburg 33-25 í þýsku úrvalsdeildinni í handbolta í dag. Kiel var 15-12 yfir í hálfleik.

Kiel á í hatrammri baráttu við Rhein-Neckar Löwen um meistaratitilinn og eru liðin jöfn að stigum þegar tvær umferðir eru eftir.

Lærisveinar Guðmundar Guðmundssonar í Löwen eru með 216 mörk í plús og Kiel 208. Löwen á léttari andstæðinga á pappírnum eftir því Kiel mætir Füchse Berlin í síðustu umferðinni. Það þarf því mikið til að lærisveinar Alfreðs Gíslasonar verji titilinn.

Guðjón Valur Sigurðsson skoraði fjögur mörk fyrir Kiel og Aron Pálmarsson tvö.