Ljónin með flottan sigur á Evrópumeisturunum

Rhein-Neckar Löwen vann gríðarlega góðan sigur á Evrópumeisturum Barcelona í B-riðli Meistaradeildar Evrópu í kvöld. Lokatölur 22-21, Ljónunum í vil.

Leikurinn var jafn og spennandi en Löwen reyndist sterkari á lokasprettinum og náði í stigin tvö. Staðan í hálfleik var 10-9, Ljónunum í vil.

Uwe Gensheimer var markahæstur í liði Löwen með sex mörk en Andy Schmid kom næstur með fimm. Alexander Petersson skoraði eitt mark en Stefán Rafn Sigurmannsson var ekki á meðal markaskorara.

Kiril Lazarov skoraði sex mörk fyrir Barcelona en Guðjón Valur Sigurðsson kom næstur með fjögur mörk.

Löwen er með tvö stig í B-riðli líkt og IFK Kristianstad, Vardar Skopje og Pick Szeged.