Njarðvík sigraði Grindavík

Njarðvík vann Grindavík með 91 stigi gegn 81 í Intersport-deildinni í körfuknattleik í gærkvöldi. Antony Lackey skoraði 25 stig fyrir Njarðvík og Páll Kristinsson 21. Páll Axel Vilbergsson var með 31 stig og Darrel Lewis 24 stig en þeir voru atkvæðamestir Grindvíkinga. Fimm leikir verða í deildinni í kvöld. Tindastóll mætir ÍR á Sauðárkróki og í tilefni þess að 40 ár eru liðin frá því að fyrsti körfuboltaleikurinn fór fram á Króknum er Sauðkrækingum og nærsveitamönnum boðið frítt á leikinn. Aðrir leikir í kvöld eru: Fjölnir – KR, Haukar – Snæfell, Keflavík – KFÍ, og Skallagrímur – Hamar/Selfoss. Keflavík tapaði fyrsta leik sínum á Íslandsmóti kvenna í vetur í Grindavík í gærkvöldi. Grindavík sigraði 61-48. Miryah Spence skoraði 17 stig fyrir Grindavík og Latoya Rose 17 stig fyrir Keflavík. ÍS sigraði Njarðvík 60-50. Signý Hermannsdóttir skoraði 19 stig og tók 22 fráköst fyrir ÍR en Vera Janjic var stigahæst hjá Njarðvík með 15 stig.