Kristófer meiddist og Furman tapaði úrslitaleiknum

Kristófer Acox og félagar hans í Furman-háskólanum komust ekki í 64 liða úrslit bandaríska háskólakörfuboltans (March Madness).

Furman, sem hafnaði í tíunda og neðsta sæti sinnar deildar, tapaði í úrslitaleik deildarinnar gegn toppliði Wofford, 67-64, í nótt.

Mikið munaði um fjarveru Kristófers sem sneri upp á vinstri ökklann snemma leiks og gat aðeins spilað sex mínútur. Gríðarlega svekkjandi fyrir Kristófer og Furman sem voru að toppa á réttum tíma í úrslitakeppninni.

Kristófer er einn albesti varnarmaður Furman-liðsins og besti frákastarinn í deildinni. Því gekk Furman erfiðlega að ráða við toppliðið eftir að hann fór út af.

Kristófer skoraði sex stig, tók eitt frákast og varði tvö skot á þeim sex mínútum sem hann spilaði sem undirstrikar hversu mikilvægur hann er liðinu. Eftir leikinn var Kristófer valinn í annað úrvalslið keppninnar (All-Tournament Championship 2nd team).

Í nótt er svo síðasta tækifæri Íslendinga til að eiga leikmann í NCAA-mótinu. Gunnar Ólafsson og félagar hans í St. Francis-skólanum í Brooklyn mæta þá Robert Morris-háskólanum í úrslitaleik NEC-deildarinnar.