Hart deilt um gisið jólatré

Borgarstjórnir belgísku og finnsku höfuðborganna, Brussel og Helsinki, eru komnar í hár saman. Ástæðan er jólatréð sem prýðir Grand Place-torgið í miðborg Brussel. Finnar hafa í fimmtíu ár séð Brusselbúum fyrir jólatré. Undanfarin ár hafa heimamenn orðið sífellt ósáttari við jólatrén sem þeir fá, segja þau of lág, gisin og illa leikin eftir langt ferðalag. Í ár létu Finnar Belgum það eftir að velja jólatré úr hinu skógi vaxna Ardenneshéraði í Belgíu. Það tré kom gisið og illa bogið til Brussel og ríkir algjör óvissa um samstarf Finna og Belga um jólatré í framtíðinni.