Ók ölvaður inn á flugvélaplanið á Keflavíkurflugvelli

Ölvaður ökumaður, sem var seinn fyrir í flug til útlanda í morgun, ók á fullri ferð í gegnum háa girðingu við Leifsstöð og inni á flugvélaplanið með fjóra lögreglubíla á hælunum. Þar stökk hann úr úr bílnum og ætlaði að hlaupa um borð í næstu vél þegar lögreglumenn hlupu hann uppi og handtóku hann umsvifalaust.

Upphaflega reyndi lögreglan úr Keflavík að stöðva hann á Reykjanesbraut þar sem hann hafði mælst á allt of miklum hraða en hann sinnti ekki stöðvunarmerkjum og stakk af. Fjórir löreglubílar voru svo að nálgast hann úr öllum áttum þegar hann lét vaða í gegnum girðinguna. Mildi þykir að hann skyldi ekki hafa ekið á flugvél. Hann gistir nú fangageymslur og verður yfirheyrður í dag.