88 og 300

Hafnfirðingar (fyrir utan álfa og huldufólk) eru 23.275 talsins og búa (eins og nafnið bendir til) í Hafnarfirði. Alcan er fjölþjóðlegt fyrirtæki með 53.000 starfsmenn í 41 landi. Hafnarfjarðar er fyrst getið í heimildum um 1400, þó er minnst á Hafnarfjörð í Landnámabók. Bjarni Sívertsen sem nefndur er faðir Hafnarfjarðar hóf að versla í Firðinum árið 1794. Alcan var stofnað rúmri öld síðar, árið 1902, sem kanadískt dótturfyrirtæki málmiðnaðarrisans Pittsburgh Reduction Company.

Í HAFNARFIRÐI eru 11.302 konur en karlarnir eru 11.149. Af bæjarbúum eru 5443 á aldrinum 0-14 ára, 14.926 bæjarbúar eru á aldrinum 15-64 ára, en 2.082 eru 65 ára og eldri; 5 Hafnfirðingar eru yfir 100 ára en elsti íbúi bæjarins er fæddur í maí árið 1902 - sama ár og Alcan var stofnað.

Í HAFNARFIRÐI eru 8 grunnskólar með rúmlega 3.650 nemendur. Um 16% íbúa eru í grunnskólum. Leikskólar eru 15 með um 1.400 börn. Í Tónlistarskólanum eru 644 nemendur. Um 75.000 ferðamenn heimsækja Hafnarfjörð á hverju árið. Bæjarlandið er um 147 ferkílómetrar og á því svæði eru kratar algengari en annars staðar á Íslandi (en kratar eru félagsverur). Hafnfirðingar eru áhugasamir um íþróttir. Hver bæjarbúi fer 16 sinnum í sund á ári og meira en 1.000.000 manns koma í íþróttahúsin. 

Í HAFNARFIRÐI var fyrsta lútherska kirkjan á Íslandi reist árið 1533 þar sem hét Háigrandi, gegnt Óseyri, rétt við smábátahöfnina. Sérstaklega góð hafnarskilyrði gerðu Hafnarfjörð snemma að einni helstu verslunarhöfn landsins og þar var aðalhöfn þýskra kaupmanna á 16. öld og á fyrri hluta einokunartímabilsins á 17. öld. Fyrsta tilraun til þilskipaútgerðar á Íslandi var gerð í Hafnarfirði á árunum 1753-1759. Í Hafnarfirði var fyrsta almenningsrafveitan á Íslandi. Fyrsti togari Íslendinga, Coot, var gerður út frá Hafnarfirði 1905-1908. Hafnfirðingar láta hvorki mútur né hótanir stjórna gerðum sínum heldur heilbrigða skynsemi og trú á framtíðina.

ÁRIÐ 480 f. Kr. stöðvuðu 300 Spartverjar innrás Persa í Laugaskarði. Á laugardaginn stöðvuðu 88 Hafnfirðingar innrás Alcan í Hafnarfjörð.