Ekki-maðurinn

Evran verður ekki tekin upp í stað krónunnar sem gjaldmiðill á Íslandi í tíð núverandi ríkisstjórnar. Geir H. Haarde forsætisráðherra kvað upp úr um þetta á fundi með sjálfstæðismönnum í Valhöll í morgun." (dv.is 29. sept. 2007) „Geir segist ekki hafa lagt blessun sína yfir samruna REI og Geysi Green Energy." (mbl.is 6. nóv. 2007)

„Forsætisráðherra segir að þótt lífskjör mælist þau bestu í heimi hér á landi, þá setji það ekki sérstaka pressu á Ísland í alþjóðasamfélaginu í umhverfismálum né öðrum." (mbl.is 27. nóv. 2007) „Í stjórnarsáttmálanum er gert ráð fyrir því að skattalækkanir á kjörtímabilinu komi til greina, en þær hafa ekki verið tímasettar. Þannig að það er ekki verið að fresta neinu sem þegar var búið að ákveða," segir Geir H. Haarde forsætisráðherra í samtali við Morgunblaðið. (mbl.is 1. des. 2007)

„Geir H. Haarde forsætisráðherra telur að álit mannréttindanefndar Sameinuðu þjóðanna gefi ekki tilefni til lagabreytinga á Íslandi." (eyjan.is 15. jan. 2008) „Geir H. Haarde forsætisráðherra segir að þær breytingar sem urðu í borgarstjórn í gær muni ekki hafa áhrif á störf ríkisstjórnarinnar." (mbl.is 22. jan. 2008) „Í viðtali við norska ríkissjónvarpið 26. janúar sl. áréttaði Geir H. Haarde forsætisráðherra að það væri ekki á dagskrá hjá íslenskum stjórnvöldum að sækja um aðild að Evrópusambandinu." (heimssyn.is 31. jan 2008) „Sagðist Geir telja, að settur dómsmálaráðherra hefði ekki getað skipað umsækjanda, sem dómnefndin mæti ekki hæfan í starfið." (mbl.is 31. jan. 2008)

„Ekki stendur til að gera breytingar á gjaldmiðlinum á næstunni, sagði Geir H. Haarde, forsætisráðherra, á Alþingi í dag." (mbl.is 4. feb. 2008)

„Geir H. Haarde forsætisráðherra sagði á Alþingi í dag að engar ákvarðanir hafi verið teknar um að lækka opinberar álögur á eldsneyti." (mbl.is 21. feb. 2008) „Geir H. Haarde forsætisráðherra vill ekki svara því hvort hann styðji Vilhjálm Þ. Vilhjálmsson til að taka sæti borgarstjóra." (mbl.is 11. feb. 2008) „Geir H. Haarde forsætisráðherra sagði í ræðu sinni í dag að aðild að Evrópusambandinu væri ekki á dagskrá hjá núverandi ríkisstjórn og þar af leiðandi ekki heldur upptaka evrunnar." (landpostur.is 13. feb. 2008)

„Geir H. Haarde, forsætisráðherra, sagðist í viðtali í Silfri Egils í morgun ekki óttast að kreppa væri framundan þrátt fyrir erfiða stöðu á fjármálamarkaði og í sjávarútvegi." (mbl.is 17. feb. 2008) „Geir segist ekki telja hættu á gengishruni krónunnar." (mbl.is 23. feb 2008) „Juncker spurði Geir að því á fundinum hvort það væri rétt að Íslendingar íhuguðu að taka upp evru einhliða og svaraði Geir því til að það stæði ekki til." (mbl.is 26. feb 2008)

„Forsætisráðherra í viðtali við Bloomberg-fréttastofuna: Ekki hætta á samdrætti í íslensku efnahagslífi." (mbl.is 14. mars 2008) „Geir H. Haarde forsætisráðherra sagði að loknum ríkisstjórnarfundi rétt fyrir hádegi að staðan í efnahagsmálum hérlendis væri ekki komin á það stig að það kallaði á sérstakar aðgerðir ríkisstjórnarinnar. (mbl.is 18. mars 2008) „Geir H. Haarde, forsætisráðherra, sagði eftir ríkisstjórnarfund að ástæður gengisfalls krónunnar megi rekja til vandræða sem bandaríski fjárfestingarbankinn Bear Stearns lenti í um helgina. Ríkisstjórnin áformi ekki að grípa til sérstakra aðgerða nú." (mbl.is 18. mars 2008)

„Geir H. Haarde forsætisráðherra segir að ekkert sé athugavert við það að hann og utanríkisráðherra fari með einkaþotu til Búkarest í Rúmeníu á fund Norður-Atlantshafsbandalagsins." (mbl.is 2. apríl 2008) „Geir H. Haarde forsætisráðherra vildi á Alþingi í dag ekki upplýsa frekar um aðgerðir ríkisstjórnarinnar og Seðlabanka Íslands í efnahagsmálum." (vb.is 7. apríl 2008)

„Geir sagði aðspurður að Ingibjörg Sólrún hefði ekki verið að tala um það um helgina að afnema eftirlaunalögin í heild." (vb.is 13. maí 2008) „Geir: Ég vil ekki ganga í ESB." (mbl.is 17. maí 2008)

„Geir H. Haarde, forsætisráðherra, telur að ekki sé útilokað að svartsýnisspár um efnahagshorfur á Íslandi gangi ekki eftir." (mbl.is 5. jún. 2008) „„Við skoðum þessi mál eins oft og við þurfum. Það þarf ekki hvatningu frá öðrum til þess," sagði Geir H. Haarde, forsætisráðherra, aðspurður um ákall fulltrúa vinnumarkaðarins um aðgerðir ríkisstjórnarinnar í efnahagsmálum." (mbl.is 19. jún. 2008)

„Geir H. Haarde, forsætisráðherra, segir hugmyndir um upptöku evru á grundvelli EES-samningsins ekki nýjar af nálinni." (vb.is 14. júl. 2008) „Geir H. Haarde forsætisráðherra segir ríkisstjórnina ekki munu ganga lengra í friðun Þjórsárvera en sem segir í stjórnarsáttmálanum." (mbl.is 14. júl. 2008)