Hvetur fólk til að elda

Haukur Valgeir Magnússon, matreiðslumaður á Argentínu steikhúsi, vann hjá Jamie Oliver í London. Hann viðurkennir að vera undir áhrifum frá honum í matargerð og fleiru og vill að fólk eldi meira sjálft heima.

„Matreiðsla er engin geimvísindi og í raun mjög einföld ef þú ert með uppskrift,“ segir Haukur Valgeir en hann er nýbyrjaður að elda á Argentínu eftir að hafa unnið hjá Jamie Oliver í London.

Haukur lætur vel af vistinni hjá Jamie og segist hafa tekið með sér einhverja takta frá honum hingað heim. „Þessi réttur er eiginlega beint þaðan, mín hugmynd en undir áhrifum frá Jamie. Bretar elda mikið kjöt með beini og eru mikið fyrir sultur og kryddsmjör. Eins langar mig að virkja krakka sem eru kannski milli skóla eða atvinnulausir í að læra að elda eins og Jamie Oliver hefur verið að gera. Ég vil að fólk eldi meira sjálft heima,“ segir hann.

Lambahryggvöðvi með lauksultu og bernaise-smjöri. Fyrir fjóra.

Lambahryggvöðvi:

800 gr. lamb brúnað á pönnu í 3 mínútur á hvorri hlið. Eldað í ofni við 180° C í 5-6 mínútur.

Lauksulta:

1 kg laukur, 4 tegundir

½ l hvítvín

50 gr. sykur

100 ml hunang

Salt og pipar

Lárviðarlauf og vöndur af blönduðum kryddjurtum.

Aðferð: Skerið laukinn í þunnar skífur, svitið hann í potti, bætið svo við hvítvíninu, hunangi, sykri og kryddinu. Látið malla við lágan hita í 3 tíma.

Bearnaise-smjör:

500 g smjör

20 ml estragonedik

Þurrkað estragon

30 ml hvítvínsedik

Salt og pipar

Aðferð: Smjör er mýkt, sett í hrærivél ásamt öllu hráefninu og hrært saman. Mótað á silíkonmottu.