Frambjóðendur í Norðvesturkjördæmi valdir með póstkosningu

Á aukakjördæmisþingi framsóknarmanna í Norðvesturkjördæmi sem haldið er í dag að Reykjum í Hrútafirði var samþykkt tillaga þess efnis að val í fjögur efstu sætin á framboðslista framsóknarmanna í kjördæminu vegna kosninga til Alþingis í vork skyldi fara fram með póstkosningu allra félagsmanna í kjördæminu.

Þrír sækjast eftir fyrsta sætinu á framboðslista Framsóknarflokksins í kjördæminu nú þegar Magnús Stefánsson hefur tilkynnt að hann sækist ekki eftir endurkjöri. Friðrik Jónsson, sérfræðingur í alþjóðasamskiptum og formaður Framsóknarfélagsins á Akranesi, Gunnar Bragi Sveinsson, sveitarstjórnarmaður í Skagafirði og Guðmundur Steingrímsson rithöfundur.

Atkvæðaseðlar verða sendir út þann 3. mars en talning fara fram föstudaginn 13. mars. Skipan í önnur sæti á listann verður ákveðin á kjördæmisþingi sem boðað verður til í framhaldinu.