Keflavík lagði Njarðvík

Keflavík vann í kvöld sigur á grönnum sínum í Njarðvík í fyrsta leik liðanna í fyrstu umferð úrslitakeppni Iceland Express deildarinnar.

 Smelltu hér til að sjá tölfræðina.

Leik lokið. Keflavík 96 - Njarðvík 88.

20:52. Keflavík hefur yfir 91-85 og 50 sekúndur eftir af leiknum. Njarðvík tekur leikhlé.

20:44 - Njarðvíkingar eru ekki hættir og minnka muninn í 84-79 þegar 3:45 eru eftir af leiknum. Keflavík virtist með unninn leik í höndunum en þeir grænu eru ekki búnir að segja sitt síðasta.

20:39. Keflvíkingar eru með leikinn í hendi sér og hafa yfir 80-67 þegar 6:34 eru eftir af fjórða leikhlutanum.

Þriðja leikhluta lokið. Keflavík 69 - Njarðvík 58.

Keflvíkingar eru skrefinu á undan sem fyrr og virðast ekki líklegir til að tapa þessum leik. Gunnar Einarsson kom liðinu 11 stigum yfir um leið og lokaflautið í þriðja leikhlutanum gall.

20:22 - Keflavík hefur yfir 59-49. Heimamenn komu mun ákveðnari inn í síðari hálfleikinn og eftir þriggja stiga körfu frá Sverri Sverrissyni ákvað Valur Ingimundarson þjálfari Njarðvíkur að taka leikhlé. 5:36 eftir af þriðja leikhluta.

20:11 - Þess má til gamans geta að KR hefur yfir 68-35 gegn Breiðablik í hálfleik í hinum leiknum í Iceland Express deildinni. Jón Arnór Stefánsson er ekki í liði KR í kvöld en þess í stað hafa Jason Dourisseau (23 stig) og Nemanja Sovic (21 stig) ákveðið að fara í skotkeppni í fyrri hálfleiknum.

20:07 - Þegar tölfræðin í fyrri hálfleik er skoðuð kemur í ljós að Njarðvíkingar eru með talsvert betri skotnýtingu en Keflvíkingar, en heimamenn hafa unnið það upp með því að vinna baráttuna um fráköstin 26-19.

Þar munar mikið um að Keflavík hefur hirt 16 sóknarfráköst gegn aðeins 2 hjá Njarðvík. Jón N. Hafsteinsson hjá Keflavík er með 6 sóknarfráköst í leiknum.

19:58. Hálfleikur. Keflavík 43 - Njarðvík 40.

Þá er kominn hálfleikur hér í Keflavík og heimamenn hafa þriggja stiga forystu. Keflavíkurliðið náði tíu stiga forskoti um miðjan annan leikhluta en Njarðvíkingar gáfust ekki upp og voru rétt búnir að jafna í lok hálfleiksins.

Jesse Rosa er atkvæðamestur hjá Keflavík með 17 stig og 7 fráköst og Hörður Axel Vilhjálmsson er með 10 stig. Hjá Njarðvík er Heath Sitton með 14 stig og Logi Gunnarsson 10.

19:53 - Keflavík hefur yfir 36-26 og lítið gengur hjá þeim grænklæddu.

19:46 - Keflvíkingar hafa enn yfir 31-25 þegar 6:30 er eftir af fyrri hálfleik.

19:38. - Fyrsta leikhluta lokið. Keflvíkingar hafa yfir 24-19 eftir frábæran fyrsta leikhluta. Hraðinn er mikill og áhorfendur að fá nóg fyrir peninginn.

19:30. Leikhlé. Keflavík hefur yfir 20-19 og útlit fyrir að leikurinn verði jafn og spennandi. Jesse Rosa er kominn með 9 stig hjá Keflavík en Logi Gunnarsson 8 hjá Njarðvík.

19:25 - Fyrsti leikhluti hálfnaður og staðan jöfn 15-15. Leikurinn er mjög fjörugur og byrjar talsvert betur en viðureign liðanna í deildinni á dögunum.

19:08 - Þá eru aðeins nokkrar mínútur í leik og eftirvæntingin mikil. Enn er pláss fyrir nokkra áhorfendur í viðbót í íþróttahúsinu og því er um að gera fyrir Keflvíkinga sem lesa þetta að drífa sig á völlinn.

18:57 - Gott kvöld. Vísir er klár í Keflavík þar sem pallarnir eru að fyllast og stemmingin góð hér í Sláturhúsinu eins og alltaf þegar vorar. Keflvíkingar eru að hita upp en þeir grænklæddu að teygja á hliðarlínunni.

Keflvíkingar tefla fram nýjum bandarískum leikmanni í kvöld, Jesse Rosa, en sá spilaði með liðinu í haust áður en kreppan skall á íslensku þjóðinni.

Keflvíkingar eru nú búnir að gleyma kreppunni eins og grannar þeirra í Njarðvík og mæta til leiks með erlendan leikmann.