Hlynur: Það hjálpaði líka til að Nonni Mæju vaknaði

Hlynur Bæringsson var traustur að vanda þegar Snæfellingar unnu 20 stiga sigur á ÍR í Iceland Express deild karla í kvöld. Hlynur var með 14 stig, 14 fráköst og 6 stoðsendingar í leiknum.

„Ég held að við séum í betra formi en þeir. Mér sýndist það á öllu. Þeir eru með mjög hæfileikaríka menn en mér fannst þeir bara springa. Það hjálpaði líka til að Nonni Mæju vaknaði," sagði Hlynur en Snæfell vann þriggja mínútna kafla í þriðja leikhluta 21-2 og náði fyrir vikið upp 25 stiga forskoti og að gera út um leikinn.

„ÍR-ingar eru með mjög marga hæfileikaríka gaura en helsti gallinn hjá þeim er að tveir af bestu mönnunum þeirra eru nánast alveg eins. Þeir eru báðir mjög góðir leikmenn en með sömu galla og sömu kosti," sagði Hlynur og bætti við:

„Það var mjög erfitt fyrir þá að missa Sveinbjörn Claessen í meiðsli sérstaklega þegar bestu leikmennirnir eru inn í teig. Það var mjög slæmt fyrir þá að missa besta bakvörðinn sinn og það hlýtur að vera mjög erfitt að spila sig út úr því," sagði Hlynur:

Snæfell hefur unnið 5 af 7 leikjum sínum en Hlynur er þó ekki tilbúinn að leggja sitt mat á liðið.

„Við erum ekki búnir að gera neitt í vetur því við erum bara búnir að vinna lið sem við teljum að við eigum að vinna. Við höfum ekki spilað við bestu liðin og ég held að við verðum að bíða með það að sjá hvað við getum því við erum ekki búnir að spila við þessi bestu lið," sagði Hlynur en það á eftir að breytast á næstu vikum.

„Við eigum alvöru dagskrá fram undan. Við mætum fyrst Tindastóli sem vann Stjörnuna og síðan eigum við Grindavík, Njarðvík og KR í einni runu," sagði Hlynur sem sagðist jafnframt bíða spenntur eftir þessum leikjum.