Angelina og Brad dúkka upp í Bosníu

Ofurparið Angelina Jolie og Brad Pitt komu flóttamönnum í Bosníu á óvart þegar þau heimsóttu flóttamannabúðir á mánudag.

Þar heimsóttu þau tvær fjölskyldur sem flúðu átökin í borgarastyrjöldinni fyrir fimmtán árum síðan og eru enn heimilislausar. Sögunni fylgir að konurnar í fjölskyldunum voru sérstaklega eftir sig í eftir heimsóknina. Höfðu þær orð á því hvað Brad Pitt væri dagfarsprúður maður.

Angelina og Brad eyddu deginum í Bosníu og flugu síðan til strandbæjarins Tivat í Svartfjallalandi. Á eftir þeim fylgdi hersing fjölmiðlamanna en þeim tókst þó að stinga þá af. Þessa dagana halda þau til í Feneyjum en þar leikur Angelina á móti Johnny Depp í myndinni The Tourist. Henni er leikstýrt af Florian Henckel von Donnersmarck, sem gerði einnig hina stórgóðu þýsku mynd Líf annarra.