Konrad Tota ráðinn þjálfari beggja liða Þórs

Það verður nóg að gera hjá Kanadamanninum Konrad Tota á Akureyri á næsta tímabili. Hann hefur verið ráðinn þjálfari bæði karla og kvennaliðs Þórs auk þess sem hann mun leika með liðinu í 1. deild karla.

Tota lék með Þór í efstu deild seinni hluta keppnistímabilsins 2008-2009 og var í vetur spilandi þjálfari hjá Skallagrími.

Sigurður Grétar Sigurðsson verður aðstoðarmaður hans en Sigurður lék með Þór á árum áður og meðal annars kostinn Íþróttamaður Þórs árið 1997, þá 18 ára gamall.

Frá þessu var greint á vef Þórs en þar segir einnig að Ólafur Torfason og Bandaríkjamaðurinn Wesley Hsu spili með liðinu í vetur. Báðir hafa leikið áður með Þór.