Ingi: Ekki hægt að vinna titilinn á einum manni

Ingi Þór Steinþórsson, þjálfari Snæfells, segir mikla tilhlökkun ríkja hjá sínum leikmönnum fyrir leik liðsins gegn Keflavík í kvöld.

Liðin mætast í oddaleik um Íslandsmeistaratitil karla í körfubolta í Keflavík í kvöld en staðan í einvígi liðanna er 2-2. Snæfell átti möguleika á að vinna titilinn á heimavelli sínum á mánudaginn en þá vann Keflavík góðan sigur.

„Hólmarar voru kannski búnir að taka við titlinum á mánudaginn. Við fórum aðeins fram úr okkur og spennustigið í hópnum var ekki gott. En það verður allt lagt í sölurnar í kvöld," sagði Ingi við Vísi.

„Ég held að það lið sem takist betur að stjórna spennustiginu og koma sínum leik fram sem fyrst muni vinna leikinn," sagði Ingi og hefur hann því verið að huga að því hjá sínum leikmönnum.

„Það er mjög mikilvægt að leikmenn einbeiti sér að ákveðnum hlut sem liðið ætlar sér að gera og festist í þeirri hugsun. En tilhlökkunin er mikil og þetta verður feykilega gaman. Það er gaman að fá að taka þátt í svona oddaleik annað árið í röð."

Ingi var aðstoðarþjálfari karlaliðs KR í fyrra og þá varð liðið Íslandsmeistari eftir sigur á Grindavík í oddaleik.

„Nú þurfum við að ná fram þeirri liðsheild sem kom okkur í þessa stöðu. Við vorum ekki sáttir við hvernig við spiluðum síðast og ekki sáttir við heildarframlag liðsins. Það voru of margir að spila undir pari."

„Þór svo að Hlynur [Bæringsson] sé búinn að spila óaðfinnanlega þá er það ómögulegt að ætla sér að vinna titilinn á einum manni. Það er bara ekki hægt. Við erum því meðvitaðir um að það er liðið allt sem þarf að skila sínu."

Ingi á von á því að fá góðan stuðning í Keflavík í kvöld. „Okkar stuðningsmenn hafa verið frábærir í allan vetur og enn frekar í úrslitakeppninni. Þeir hafa fylgt okkur í frá fyrsta útileiknum okkar í Grindavík og eiga hrós skilið."