Ólíklegt að brotleg lönd verði svipt atkvæðisrétti

Fulltrúar Þýskalands og Frakklands reyna að fá fulltrúa annarra ríkja Evrópusambandsins (ESB) til að styðja nýjar reglur um ríkisútgjöld sem nauðsynlegar séu til að forða annarri skuldakreppu í Evrópu.

Angela Merkel, kanslari Þýskalands og Nicolas Sarkozy Frakklandsforseti mættu til tveggja daga ráðstefnu Evrópuríkja í Brussel í gær. Á ráðstefnunni fara þau fram á að búin verði til neyðarlausn sem skylda myndi lánafyrirtæki í einkaeigu til að taka á sig hluta kostnaðar við að bjarga mjög skuldugum löndum.

Um leið kalla þau eftir stuðningi við tillögu um að lönd sem ítrekað fari fram úr fjárlögum verði svipt atkvæðisrétti í ESB. Sú tillaga þykir afar róttæk og draga sumir embættismenn í efa að hún muni ná fram að ganga.

Herskár tónn er sagður í Angelu Merkel sem vill að þjóðir, sem ekki takist á við heilbrigðar aðgerðir í ríkisfjármálum, þurfi þá að horfa upp á að missa atkvæðisrétt sinn. „Ógni þjóð heilbrigði evrunnar skekur hún grunnstoðir ESB," sagði hún.

Leiðirnar sem Þjóðverjar og Frakkar leggja til eru líklega báðar sagðar kalla á breytingar á grunnsáttmála ESB. Breytingar á honum eru þó ekki auðsóttar og ferlið allt líklegt til að taka nokkur ár. Þannig tók tíu ár að fá samþykki Evrópuríkja fyrir gildandi Lissabon-sáttmála. Fyrri útgáfum sáttmálans var árið 2005 hafnað í þjóðaratkvæðagreiðslum í Hollandi og Frakklandi, auk þess sem Írar felldu sáttmálann nokkrum sinnum.

José Manuel Barroso, forseti framkvæmdastjórnar ESB, sagði afnám atkvæðisréttar aðildarríkja „óásættanlegt" og taldi tillögu um slíkt aldrei verða samþykkta í öllum 27 aðildarríkjunum.

Nokkrir þjóðarleiðtogar og embættismenn ESB tóku í gær undir orð hans. „Við horfum mjög gagnrýnum augum á allar breytingar á sáttmála ESB," sagði Josef Proell, fjármálaráðherra Austurríkis.

Angela Merkel er hins vegar sögð hafa gert stuðning við breytingar á sáttmálanum að skilyrði stuðnings Þjóðverja við strangari reglur um ríki sem fara fram úr fjárlögum, sem einnig eru til umfjöllunar á ríkjaráðstefnunni. Fjármálaráðherrar ESB lögðu í síðustu viku til viðvaranir og mögulegar sektir á ríki sem brjóta reglur sambandsins um skuldir og fjárlagahalla.

olikr@frettabladid.is