Aðgerðirnar í dag beinast eingöngu að lánum til Tchenguiz

Aðgerðir Serious Fraud Office (SFO) og sérstaks saksóknara í dag tengjast eingöngu rannsóknum á meintum brotum vegna lánveitinga Kaupþings til Robert Tchenguiz og tengdra aðila en ekki meintum blekkingum eða villandi upplýsingagjöf Kaupþings í Bretlandi eða rannsókn SFO á EDGE-reikningunum, líkt og breskir fjölmiðlar greindu frá í dag.



Húsleit var gerð á skrifstofum tveggja fyrirtækja í Lundúnum í morgun og á heimilum átta einstaklinga. Sjö voru handteknir í aðgerðunum sem efnahagsbrotadeild bresku lögreglunnar, Serious Fraud Office, réðst í með fulltingi lögreglunnar í Lundúnum og Essex. Meðal þeirra sem handteknir voru í Lundúnum eru bræðurnir Robert og Vincent Tchenguiz, Ármann Þorvaldsson, fyrrverandi forstjóri Kaupþings Singer & Friedlaner í Lundúnum, Sigurður Einarsson, fyrrverandi stjórnarformaður Kaupþings og Guðni Níels Aðalsteinsson, fyrrverandi framkvæmdastjóri fjárstýringar Kaupþings. Nöfn tveggja annarra sem handteknir voru í Lundúnum eru óþekkt.



Í Reykjavík var gerð húsleit á heimilum tveggja einstaklinga og tveir voru handteknir, en um er að ræða Bjarka Diego, fyrrverandi framkvæmdastjóri útlána Kaupþings og Guðmund Þór Gunnarsson, sem var viðskiptastjóri á útlánasviði Kaupþings. Ráðist var í þessar húsleitir og handtökur að beiðni Serious Fraud Office en lögreglumenn og rannsakendur frá embætti sérstaks saksóknara sáu um aðgerðirnar ásamt fulltrúum frá bresku stofnuninni.



Sigurði Einarssyni sleppt síðdegis

Sigurði Einarssyni var sleppt síðdegis að lokinni skýrslutöku. Ekki stóð til að hneppa hina handteknu í gæsluvarðhald, heldur var stefnt að því að sleppa þeim að loknum skýrslutökum.



Rannsókn Serious Fraud Office á Kaupþingi hefur staðið yfir frá haustinu 2009. Í fyrstu rannsakaði embættið ranga og villandi upplýsingagjöf til sparifjáreigenda á EDGE-reikningunum í Bretlandi og aðgerðir stjórnenda bankans fyrir hrun. Sú rannsókn er enn opin. Samkvæmt heimildum fréttastofu voru aðgerðirnar í dag eingöngu vegna rannsóknar á útlánum Kaupþings til Robert Tchenguiz og tengjast ekki eldri rannsóknum.

Grunur um umboðssvik

Robert Tchenguiz var langstærsti lántakandi Kaupþings banka. Við hrun bankans námu útlán til hans tveimur milljörðum evra, jafnvirði 320 milljarða króna. Bresk refsilöggjöf er nokkuð ólík hegningarlögunum íslensku, en samkvæmt heimildum fréttastofu eru stjórnendur Kaupþings grunaðir um brot á ákvæðum sem eru skyld umboðssvikum í almennum hegningarlögum, þ.e þeir eru taldir hafa misnotað aðstöðu sína til lánveitinga til Tchenguiz með tilheyrandi tjóni fyrir hluthafa og kröfuhafa bankans. thorbjorn@stod2.is