Innlent

Alveg viss um að skólinn myndi hrynja

Erla Hlynsdóttir skrifar
Villimey Sigurbjörnsdóttir er skiptinemi við J.F. Oberlin háskólann í Machida sem er á Tókíó-svæðinu.
Villimey Sigurbjörnsdóttir er skiptinemi við J.F. Oberlin háskólann í Machida sem er á Tókíó-svæðinu.
„Ég var akkúrat í háskólanum í þreki þegar ég fann fyrir skjálftanum," segir Villimey Sigurbjörnsdóttir, skiptinemi við J.F. Oberlin háskólann í Machida sem er á Tókíó-svæðinu. „Ég hef aldrei fundið fyrir svona rosalegum skjálfta áður. Ég var um tíma alveg viss um að ein skólabyggingin myndi annað hvort hrynja eða glerin brotna," segir hún.

Í fyrstu taldi Villimey að um lítinn skjálfta væri að ræða. „En svo sá ég að hinir krakkarnir í þrekinu byrjuðu að fara út úr byggingunni. Ég náttúrulega elti hina og fann þá fyrir alvöru hvað jörðin hristist mikið. Ég stóð bara þarna og fylgdist með byggingunum sveiflast til og frá," segir Villimey.

Gríðarlega sterkur jarðskjálfti upp á 8,9 á Richter reið yfir svæðið í morgun. Byggingar hafa hrunið og tala látinna komin upp í 44.

Villimey segist hafa fundið fyrir fjölda eftirskjálfta en að almenningur í Tókíó sé nú orðinn rólegri.

Hún var þó í miklu uppnámi þegar stóri skjálftinn reið yfir. „Það versta var að símalínur virkuðu ekki þannig að ég gat ekki haft samband við eiginmann minn," segir hún en eiginmaðurinn er líka Íslendingur. „Svo furðulega vildi til að Facebook virkaði í símanum mínum þannig að ég gat sent öllum skilaboð um að það væri allt í lagi með mig," segir Villimey.

Lestarkerfið, sem er aðalsamgöngumáti fólks í Tókóí, liggur niðri og margir því fastir þar sem þeir voru í skjálftanum.

Jarðskjálfti í Japan

Tengdar fréttir

Öflugur skjálfti undan ströndum Japans - flóðbylgjuviðvörun gefin

Öflugur jarðskjálfti, 8,8 á richter-kvarðanum, reið yfir norðausturströnd Japans í morgun.Byggingar í höfuðborginni Tókíó skulfu í nokkrar mínútur og fólk þusti út á götur borgarinnar en engar fregnir hafa borist af manntjóni. Flóðbylgjuviðvörun var gefin út fyrir stórt svæði og gæti bylgjan orðið allt að sex metra há en viðvörunin gildir fyrir Japan, Rússland, Guam, Tæwan og Fillipseyjar. Einnig hefur viðvörun verið gefin út fyrir Indónesíu og Hawaí.

Að minnsta kosti átta látnir í Sendai

Að minnsta kosti átta létust þegar tíu metra há flóðbylgja skall á hafnarbænum Sendai í Japan í morgun í kjölfar gríðarlega öflugs jarðskjálfta á svæðinu. Skjálftinn mældist 8,9 á richter skalanum og er sjöundi stærsti skjálfti í sögunni. Flóðbylgjan hreif með sér bíla og skip í höfninni og eyðilagði fjölda húsa. Þá hefur skemmtigarður Disney í Tókíó orðið illa úti auk þess sem mikill eldur geisar í olíuhreinsistöð í borginni Ichihara.

Sendiherra hvetur Íslendinga til að láta vita af sér

Stefán Lárus Stefánsson, sendiherra í Japan, hvetur Íslendinga sem eru á skjálftasvæðinu í Japan að láta vita af sér á Facebook. Hann segir sendiráðið reikna með því að um 65 Íslendingar séu þar og þegar hafa um þrjátíu manns haft samband.

Íslendingur í Japan býr sig undir tsunami

Hinrik Örn Hinriksson, skiptinemi í Japan, heyrði fyrst af jarðskjálftanum þegar hann fékk sms-skilaboð frá vini sínum sem sagði honum að halda sig inni. Hinrik býr í borginni Beppu í Oita-héraði sem er nokkuð langt frá upptökum skjálftans. Þar er engu að síður búist við tsunami-fljóðbylgjum og fara þyrlur reglulega með ströndinni til að fylgjast með sjóhæð. Vegna þessa er einnig byrjað að rýma íbúðir við ströndina sem standa á jarðhæð. "Fólki er auðvitað brugðið og fólk býr sig undir öfluga eftirskjálfta. Ég á marga vini sem búa á Tókíó-svæðinu og við höfum öll verið í sambandi við hvort annað, þau okkar sem eru hér í námi. Allir hafa það gott. Ein var í leikfimitíma og sagði að húsið hefði skolfið í eina mínútu. Önnur vinkona mín hljóp undir skrifborð hjá sér, en ekkert amar að neinum enda Íslendingar og vön því að jörðin láti vita af sér," segir Hinrik. Hann er búsettur við ströndina, á 7. hæð í stórri blokk, og telur sig nokkuð öruggan. Hann fór út í búð eftir að stóri skjálftinn reið yfir og þar var fólk almennt frekar rólegt. Hinrik tekur þó fram að strandgæslan sinni eftirliti við ströndina og beini fólki í burtu ef það kemur of nálægt henni, vegna hættu á tsunami. Símalínur liggja víða niðri en íslenska sendiráðið í Japan leggur áherslu á að ná í sem flesta Íslendinga á svæðinu. Tölvupóstur og Facebook hafa þar komið að góðum notum. Hinrik hefur sjálfur sent tölvupóst til þeirra vina sinna og kunningja sem hann hefur enn ekki heyrt frá.

Jarðskjálftinn í Japan lækkar olíuverðið

Jarðskjálftinn í Japan hefur leitt til þess að fleiri olíuhreinsistöðvar í landinu hafa lokað. Þetta hefur svo aftur haft þau áhrif að heimsmarkaðsverð á olíu hefur lækkað töluvert í dag.

Mest lesið


Fleiri fréttir

Sjá meira


×

Mest lesið