Brynjar: Stefnum á að klára einvígið í þrem leikjum

KR-ingurinn Brynjar Þór Björnsson segir að það sé stefna KR-liðsins að klára Stjörnuna 3-0 í úrslitaeinvíginu um körfubolta og lyfta bikarnum á heimavelli á sunnudag.

"Við mætum afar beittir og stefnan sem fyrr að klára alla leiki og lyfta bikarnum á heimavelli um helgina," sagði Brynjar Þór en annar leikurinn er oft sagður vera lykilleikur í úrslitaeinvígjum.

"Þeir eru með bakið upp við vegginn en okkur hefur gengið vel að klára leik tvö hingað til. Ég hef ekki neinar áhyggjur af því að við mætum ekki tilbúnir," sagði Brynjar Þór sem var á leið á Serrano að fá sér kjúklingaburrito. Í kjölfarið var stefnan að fá sér kaffi. Svo er Brynjar klár í slaginn.

Brynjar fór algjörlega á kostum í fyrsta leiknum og skoraði 28 stig.

"Ég var mjög afslappaður fyrir þann leik. Eiginlega of afslappaður. Svo mikið að ég hafði áhyggjur. Það kom síðan í ljós að þær áhyggjur voru óþarfar," sagði Brynjar léttur.

"Það var óvenju mikið dæmt í síðasta leik og reyndar svo mikið að dómgæslan drap allt skemmtanagildi í leiknum. Línan sem dómarar leiksins buðu upp á var ekki í takt við þá línu sem hefur verið í úrslitakeppninni. Það var nákvæmlega ekkert leyft.

"Það var vissulega ekki eins skemmtilegt. Við leikmenn viljum fá að takast aðeins á. Það hentar okkur líka vel að fá að berjast aðeins. Við eigum breiðan hóp og megum við því að missa menn í villuvandræði," sagði Brynjar og bætir við að Stjarnan fái ekkert ókeypis í kvöld.

"Þeir munu fá að hafa fyrir öllum körfum og það mun reyna á úthald manna. Þetta verður hörkuleikur og ég býst við miklu sterkara Stjörnuliði en í síðasta leik."