Voru við veiðar í Tungulæk þegar gosið hófst

Félagarnir Ragnar Jónsson, Sigurður Þorsteinsson, Jóhannes Jóhannesson, Ólafur Stefánsson, Jón Vignir Steingrímsson og Steinn Steinnson voru við veiðar í Tungulæk á laugardaginn þegar gosið hófst.

Það er óhætt að segja að það er gífurlega fallegt við Tungulækinn á góðum degi. Veiðin gekk vel og voru komnir um 15 flottir birtingar á land þegar gosið hófst um klukkan 18:00 á laugardagseftirmiðdeginum.

Gosið gerði það að verkum að allri veiði var sjálfhætt og ekki nokkur leið að gera neitt nema taka saman veiðigræjurnar og komast undan öskufallinu sem var líklega einna mest þarna á öllu svæðinu.

Hér eru allir komnir inn og ekkert annað að gera en að sjá hvort það sé einhver möguleiki að komast af svæðinu.  Klukkan 12:00 var skyggnið innan við meter og öskufallið alveg gífurlegt.  Maður á kannski ekki von á þessu þegar maður skellir sér í veiði.  En gosinu er lokið samkvæmt fréttum í dag og veit það á gott fyrir heimamenn og veiðimenn.  Svæðið verður vonandi fljótt að jafna sig svo að líf komist í eðlilegar skorður sem fyrst.  En það er nokkuð víst að þessum veiðitúr gleyma félagarnir seint.