Sorgir og sigrar gröns-goðsagna

Bíó. Twenty Pearl Jam. Háskólabíó 20. september.



Háskólabíó var yfirfullt af íslenskum grönsurum og Pearl Jam-aðdáendum á þriðjudagskvöld þegar heimildarmyndin Twenty var þar sýnd í fyrsta og eina skiptið. Blandað var saman myndefni frá tuttugu ára ferli sveitarinnar, þar á meðal tónleikaupptökum og viðtölum við hljómsveitarmeðlimi.

Pearl Jam var stofnuð af fyrrverandi meðlimum Mother Love Bone. Sú sveit hætti eftir fráfall söngvarans Andrews Wood en hinn feimni Eddie Vedder, plagaður af föðurmissi, hljóp í skarðið og meistaraverkið Ten varð að veruleika. Sorginni í kringum dauða Woods og undrasnöggum uppgangi Pearl Jam innan grönssenunnar í Seattle voru gerð góð skil í fyrri hluta myndarinnar, sem var töluvert skemmtilegri en sá síðari.

Seinni parturinn var fínn en snerist um ráðsettu rokkarana í Pearl Jam, baráttu þeirra við Ticketmaster, harmleikinn á Hróarskelduhátíðinni og hvernig þeir reyndu að draga sig út úr sviðsljósinu og gera hlutina á eigin forsendum án nokkurra málamiðlana. Hápunktur síðari hlutans og kannski myndarinnar var tilfinningaríkur og snilldarlega samanklipptur „samsöngur" Vedders og Woods í Crown of Thorns, lagi Mother Love Bone. Wood var einn af mörgum grönsurum sem urðu fíkninni að bráð langt fyrir aldur fram á meðan Vedder hefur, þrátt fyrir lífshættulega klifurtilburði sína á tónleikum, staðið allt af sér og stendur nú uppi sem einn virtasti rokksöngvari samtímans.Freyr Bjarnason

Niðurstaða:Áhugaverð og vel gerð heimildarmynd um sorgir og sigra merkrar rokksveitar.