Benedikt í KR-treyju: Ekki sá sterkasti í þvottahúsinu

Það vakti athygli að Benedikt Guðmundsson, þjálfari Þórs frá Þorlákshöfn, var ekki í Þórs-hettupeysunni á bekknum að þessu sinni heldur var hann kominn í gamla KR-treyju. Blaðamanni lék forvitni á að vita hvernig stæði á þessu.

"Hvað, þetta er bara Nike-treyja," sagði Benedikt kíminn og slapp ekki við svo einfalda útskýringu. Það hlaut eitthvað meira að liggja að baki.

"Þetta bara atvikaðist svona. Konan er á Akureyri með fjölskylduna og ég er ekkert sá sterkasti í þvottahúsinu. Ég varð því að redda mér og þessi treyja var hrein."

Benedikt verður væntanlega búinn að þvo hettupeysuna fyrir oddaleikinn enda færði KR-treyjan honum enga lukku í kvöld.