Velheppnuð tilraunaveiði vekur vonir um lengingu tímabils

Nýleg tilraun með vorveiði í Svarfaðardalsá glæðir vonir stangveiðimanna um að gerlegt sé að lengja veiðitímabilið í Eyjafirði.

Steinar Rafn Beck fór til könnunarveiða í Svarfaðardalsá á laugardaginn um síðustu helgi og segir frá árangrinum í vikublaðinu Akureyri. Á stuttum tíma landaði Steinar tveimur sjóbirtingum og vænni bleikju auk þess að setja í fleiri fiska.

Svarfaðardalsá er venjulega ekki opnuð fyrr en 1. júní og er í raun fyrst og fremst síðsumarsá en tilraun Steinars vekur vonir eyfirskra veiðimanna um að nýta megi ánna betur á vorin.

"Þetta hljóta að vera gleðitíðindi fyrir alla veiðimenn og gefur von um að hægt verði að lengja veiðitímabilið á þann hátt að hægt verði að byrja fyrr að veiða en gengur og gerist hér á Eyjafjarðarsvæðinu," segir um málið á vef Stangaveiðifélags Akureyrar, svak.is.

Lýsingar Steinars af leiðangrinum í Svarfaðardalsá má lesa á akureyrivikublad.is.