Gafst upp á bleikjunni og veiddi spúna

Frekar rólegt hefur verið í Þingvallavatni síðustu daga. Á föstudaginn var reytingur af veiðimönnum í Þjóðgarðinum. Líklega um tíu í Vatnskoti en aðeins færri á Öfugsnáðanum. Aflabrögð voru samt ekkert til að hrópa húrra fyrir.

Veiðivísir náði tali af einum veiðimanni á Öfugsnáðanum. Sá hafði landað tveimur bleikjum á 7 klukkutímum. Þetta voru um það bil 2 punda fiskar.

Í Vatnskotinu voru tveir félagar að veiðum. Þeir höfðu verið þar í tíu klukkutíma og aðeins náð að landa einni bleikju á þeim tíma. Hún var reyndar nokkuð væn. Líklega ein 4 til 5 pund.

Annar þessara manna var orðinn svo þreyttur á fiskleysinu að hann skilaði flugustönginni og sótti kaststöngina, þó ekki í þeim tilgangi að egna fyrir fiski með spúni heldur til að veiða spúna upp úr vatninu. Þetta sagðist hann gera nokkrum sinnum á sumri. Hann færi einfaldlega út í vatn og ef hann sæi eitthvað glitra þá reyndi hann að krækja í það með sínum spún. Hann sagði að síðasta sumar hefði hann náð um hundrað spúnum upp úr vatninu með þessum hætti og sparað sér tugi þúsunda króna í spúnakaupum.