Laxinn hefur gefið sig í Tungufljóti

Samkvæmt veiðibókinni í Tungufljóti í Skaftárhreppi veiddust 23 laxar í þessari rómuðu sjóbirtingsá frá því í byrjun ágúst og fram til 16 september.

Lax er drjúgur meðafli í Tungufljóti. Ekki spillir fyrir að laxinn mætir gjarnan fyrr en sjóbirtingurinn sýnir sig að ráði. Þannig veiddust sex laxar frá 9. til 15. ágúst. Sá stærsti var alger risi, 96 sentimetrar og vigtaður 6,7 kíló. Hann fékkst í Klapparhyl á gulan Nobbler. Fjórir aðrir veiddust í Klapparhylnum á þessu tímabili og einn í Bjarnarfossi.

Dagana 24. til 27. ágúst kom svo aftur kippur í laxveiðina. Þessa daga eru skráðir níu laxar í veiðibókina. Þeir veiddust í Klapparhyl, Breiðufor og Búrhyl.

Í þessum mánuði komu 8 laxar á land fram til 16. september, þar af sex í hollinu 14. til 16. september. Sá stærsti af þessum löxum veiddist 15. september í Syðri-Hólma. Sá var 79 sentimetrar og áætlaður tólf pund.