Vilja svör vegna mengunarslyss

Stangveiðifélagið Lax-á ehf., leigutaki Ytri-Rangár, telur sig hafa orðið fyrir tjóni vegna mengunarslyss sem varð í ánni í september í fyrra. Lögfræðingur Lax-ár hefur sent hreppsnefnd Rangárþings ytra erindi þessa efnis og leitað eftir afstöðu sveitarfélagsins til málsins. Sveitarstjórn Rangárþings ytra hefur samþykkt að leita eftir áliti hjá lögmanni sveitarfélagsins. Eins á að kanna afstöðu fyrirtækisins Reykjagarðs vegna málsins.

Forsaga málsins er sú að 7. september í fyrra flæddi úrgangur úr kjúklingasláturhúsi Reykjagarðs við Hellu niður Ytri-Rangá vegna mistaka. Á þeim tíma var á annan tug útlendinga við veiðar í ánni sem urðu vitni að því þegar úrgangurinn; kjúklingafita, innyfli og salernispappír, komu fljótandi í gegnum veiðistaði þeirra. Áin var óveiðandi fyrst á eftir og langt fram á haust var fitubrák við bakka hennar. Ekki var um einsdæmi að ræða, að sögn starfsmanna Lax-ár á þeim tíma, en sveitarfélagið setti í kjölfarið upp hreinsistöð til að fyrirbyggja að frekari óhöpp myndu endurtaka sig.

Samkvæmt upplýsingum Fréttablaðsins þurftu forsvarsmenn Lax-ár að bjóða veiðimönnum veiðileyfi í sumar í bætur. Málið snýst ekki síst um að endurvinna ímynd Ytri-Rangár sem veiðiár í hópi þeirra viðskiptavina fyrirtækisins sem hafa komið þar til veiða árum saman.

svavar@frettabladid.is