Enginn leikur á Króknum í kvöld

Körfuknattleikssambandið hefur ákveðið að fresta leik Tindastóls og Skallagríms í Domino´s deild karla sem átti að fara fram í kvöld.

Ástæða frestunarinnar er slæm veðurspá í dag og kvöld. Ný dagsetning verður fundin hið fyrsta en vonskuveður verður um norðanvert landið næstu daga.

Þrír leikir fara fram í fimmtu umferðinni í kvöld. Keflavík tekur á móti Fjölni í Toyota-höllinni, ÍR fær Grindavík í heimsókn í Hertz-hellinn og Njarðvík tekur á móti Stjörnunni í Ljónagryfjunni í Njarðvík.