Nýr Suzuki Grand Vitara

Fyrsti bíllinn sem boðinn er með Garmin leiðsögukerfi sem staðalbúnað.

Suzuki Grand Vitara hefur lengi verið einn af eftirsóttari jeppunum í sínum stærðarflokki á Íslandi og af honum seldust 140 bílar í fyrra. Um helgina verður hann frumsýndur í nýrri gerð hjá Suzuki bílum í Skeifunni.

Suzuki Grand Vitara hefur haft þá sérstöðu frá upphafi að vera með sítengdu aldrifi ásamt læsingu á millikassa og lágu drifi. Hér er því um að ræða jeppa sem hentar íslenskum aðstæðum vel. Undir yfirbyggingunni er sterkbyggð grind, aflmikil vél og gott fjórhjóladrif með háu og lágu sídrifi með læsingu á milli fram og afturhjóla.

Nýja uppfærslan er með talsvert breyttum framenda. Grand Vitara er boðinn með 1,9 lítra, 130 hestafla dísilvél og beinskiptingu og 2,4 lítra bensínvél, 164 hestafla, beinskiptur og sjálfskiptur. Heldur hefur bæst í staðalbúnað bílsins frá fyrri gerð og meðal búnaðar sem honum fylgir má nefna lykillausa ræsingu og hann er fyrsti bíllinn sem er boðinn með Garmin leiðsögukerfi sem staðalbúnað hér á landi.

Grand Vitara verður frumsýndur hjá Suzuki bílum í Skeifunni 17 á laugardag og sunnudag milli kl. 12-16. Auk Grand Vitara verður litli jeppinn Jimny sýndur með breyttu útliti.