Laxá opnuð í ófærð og tvöföldu vatni

"Það kom á þriðja tug fiska á morgunvaktinni," segir Guðmundur Stefán Maríasson, einn þeirra sem var í miklum vatnsflaumi við opnun urrriðasvæðanna í Laxá í Mývatnssveit í gær.

"Það er mjög mikið vatn og má segja að það komi í veg fyrir að það sé eins mikil veiði og undanfarin ár," segir Guðmundur sem er að koma í fjórða skipti í röð á þessum árstima í Laxá.

Stærsti fiskurinn í gær var 65 sentímetrar. Guðmundur segir urriðann vel haldinn. "Það er ekkert að fiskinum. Það er bara vatnsmagnið sem gerir okkur erfiðara fyrir að finna hvar hann er og fá hann til að taka," útskýrir hann.

Snjórinn setur strik í veiðireikninginn þessa fyrstu daga á bökkum Laxár. "Brettingstaðir og Hamar eru lokaðir. Það er einfaldlega ófært þangað niður eftir," segir Guðmundur sem tekur þó fram að oft hafi verið kaldara í veðri í opnunni.

"En þótt það sé hlýtt og gott er nánast enginn gróður og vorið er varla komið. Vatnið er mjög kalt og hátt í að vera tvöfalt miðað við venjulegt árferði en það er að byrja að sjatna," segir Guðmundur Stefán.

Veiðin á urriðasvæðinu í Laxá í Laxárdal hefst í dag.