Klaus Frimor kennir fluguköst

Danski atvinnuveiðimaðurinn Klaus Frimor verður með kastnámskeið þar sem hann kennir grunnatriði og leiðréttir villur hjá lengra komnum.

Þetta verður fjórða árið sem Klaus verður með námskeið hérlendis í samvinnu við verslunina Veiðiflugur.

„Klaus fer yfir grunnatriði í fluguköstum og leiðréttir villur hjá lengra komnum. Námskeiðin eru tvískipt annarsvegar einhendu námskeið og hins vegar tvíhendu námskeið," segir í tilkynningu.  „Á einhendu námskeiðunum er farið yfir grunn köstin, yfirhandarköst og velti köst. Á tvíhendu námskeiðinu eru grunnköstin tekin en farið betur í veltiköstin eða Skandinavíska kastið."

Kennslan fer fram á Rauðavatni frá klukkan 18 til 22 og kostar námskeiðið 12 þúsund krónur. Innifalið í verðinu er DVD-diskur með köstunum sem Klaus Frimor er að kenna og auðveldar það fólki að rifja upp helstu atriðin í kennslunni.

Klaus mun verða hér á landi við kennslu í fjórtán daga og hefst fyrsta námskeiðið á miðvikudaginn.

Hægt er að skrá sig í verslun Veiðiflugna eða á netinu, hér.

trausti@frettabladid.is