Leyndarmálið á bak við magavöðva Margrétar Gnarr

Margrét Edda Gnarr fitnessdrottning með meiru undirbýr sig þessa dagana fyrir heimsmeistarmót í fitness sem fram fer í Úkraínu eftir mánuð. Hún fræðir okkur um stinna magavöðvana eða öllu heldur grjótharðansix-pakkann.

Planki uppáhalds kviðæfingin

„Uppáhalds kviðæfingin mín er planki í róðravél. Ég geri fimmtán endurtekningar og þrjú til fjögur sett. Ég mæli með því að fólk hafi samband við þjálfara sem býður upp á einkaþjálfun eða fjarþjálfun. Hann mun gera æfingaplan og ráðleggja fólki með mataræðið," segir Margrét en æfinguna má sjá í myndskeiðinu hér að ofan.

Heimsmeistarmót framundan

„Ég stefni á IFBB heimsmeistaramót kvenna eftir um fjórar vikur. Mótið verður haldið í Kiev í Úkraínu. Ég fer ásamt þremur öðrum gullfallegum stelpum; þær heita Karen Lind, Olga Helen og Auður Jóna, en þær hafa allar náð frábærum árangri hérlendis," segir Margrét þegar talið berst að undirbúningnum fyrir heimsmeistarmótið.

Gekk ekki vel í fyrra

„Ég keppti á þessu móti í fyrra og það gekk ekkert alltof vel þar sem ég var með of mikinn vöðvamassa og alls ekki nógu skorin. Ég fékk þó mjög góða reynslu á þessu móti og vissi eftir það hvernig ég ætti að mæta til leiks að ári liðnu," segir hún.

„Stelpurnar frá austur Evrópu eru að pakka saman öllum stórmótunum en eru þær mikið fíngerðari en við erum vanar að sjá hér heima."

„Ég tók mér nokkra mánaða pásu frá fitness keppnum til að vinna að því að ná þessu fíngerða looki Ég vildi ekki reyna að ná því á of skömmum tíma því það er alls ekki hollt fyrir líkamann. Ég tók mér góðan tíma og ég er mjög ánægð með að hafa gert það því í dag er ég með mikið fíngerðara look og er skornari en ég var á mótsdegi í fyrra. Mér líður vel líkamlega og andlega sem skiptir mig mjög miklu máli."

Vika hjá Margréti

„Ég lyfti sex daga vikunnar og tek auka brennslur þrisvar í viku. Venjuleg lyftingaæfing byrjar á 10-15 mínútna upphitun. Ég lyfti svo í sirka klukkutíma og tek 20 mínútna brennslu í lokin. Jóhann Norðfjörð þjálfarinn minn sér um mín æfingaprógröm. Svona er skiptingin á mínu æfingaprógrami:"

Mánudagur - axlir,tvíhöfði og þríhöfði.

Þriðjudagur - fætur,rass,kálfar og kviður.

Miðvikudagur - brjóst,bak og kviður.

Fimmtudagur - tvíhöfði,þríhöfði,axlir og kviður.

Föstudagur - fætur,rass,kálfar og kviður.

Laugardagur - bak og brjóst.

Sunnudagur - hvíld.



Býður upp á fjarþjálfun

„Ég sjálf býð uppá fjarþjálfun og tek að mér bæði stelpur sem vilja keppa í fitness og stelpur eða konur sem vilja komast í betra form og öðlast heilbrigðari lífsstíl," segir Margrét Edda að lokum.

Hægt er að lesa allt um þjálfun Margrétar hér: https://mgnarrthjalfun.blogspot.com