Íslensk hljómsveit hitar upp fyrir The Pixies

Íslenska hljómsveitin Mono Town mun hita upp fyrir The Pixies á tónleikaferð þeirra síðarnefndu um Skandinavíu.

 

Mono Town er þriggja manna sveit úr Reykjavík skipuð bræðrunum Daða og Berki Birgissonum sem gerðu garðinn frægan í funksveitinni Jagúar fyrir nokkrum árum, og Bjarka Sigurðssyni sem gaf út plötu undir eigin nafni árið 2007.

 

Mono Town spiluðu á Icelandairwaves hátíðinni í fyrra og tóku m.a. lagið fyrir KEXP útvarpsstöðina sem hefur stutt rækilega við bakið á sveitinni síðan. Sömuleiðis vöktu tónleikar Mono Town á All Tomorrow´s Parties hátíðinni lukku. Frumburður sveitarinnar, In The Eye Of The Storm, er væntanlegur en sveitin hefur sjálf stýrt upptökum á plötunni.

 

The Pixies þarf vart að kynna fyrir rokkunnendum en sveitin sló í gegn með plötum eins og Surfer Rosa og Doolittle og höfðu gríðarleg áhrif á árunum um og fyrir 1990. Sveitin lék á tvennum tónleikum í Kaplakrika árið 2004 sem voru partur af endurkomutúr þeirra það árið.

 

Mono Town hitar upp fyrir The Pixies:

Á Falconer í Kaupmannahöfn 13 Nóvember.

Í Sentrum Center í Osló 14 Nóvember.

 Í Munchen Brewery í Stokkhólmi 15 Nóvember.

 

Uppselt er á alla tónleikana.

 

Hér fyrir neðan má sjá myndband frá tónleikunum sveitarinnar fyrir KEXP útvarpsstöðina á seinustu Icelandairwaves hátíð.