Árni Hjörvar spilar með John Fogerty

Árni Hjörvar Árnason og félagar í hljómsveitinni Vaccines skelltu sér á svið ásamt Mumford and Sons og John Fogerty um helgina.

Hljómsveitin Mumford and Sons, sem er ein stærsta hljómsveit heims um þessar mundir, er þessa dagana að túra um Bandaríkin og ber tónleikaferðalagið yfirskriftina Gentlemen Of The Road.



Bretarnir geðþekku hafa fengið margar af sínum uppáhaldssveitum til að hita upp fyrir sig á tónleikaferðalaginu og undanfarið hafa The Vaccines og hljómsveitin Fun troðið upp áður en að Marcus Mumford og félagar stíga á svið. Á laugardagskvöldið voru tónleikar í Flórída og komu veikindi í veg fyrir að hljómsveitin Fun gæti spilað. Þá var hóað í John Fogerty, gömlu Creedence Clearwater Revival hetjuna. Strákarnir í Mumford And Sons og The Vaccines léku undir í helstu smellum Creedence. Myndband af fjörinu má sjá hér fyrir neðan.