Stúlkurnar komnar í skóla

Stúlkurnar sem fluttar voru með einkaflugvél frá Danmörku til Íslands í forræðisdeilu á milli föður og móður eru allar komnar í skóla hér á landi. Þetta kemur fram í tilkynningu frá móðurinni, Hjördísi Svan Aðalheiðardóttur.

Hjördís segir að bæði kennarar og nemendur hafi tekið stúlkunum opnum örmum og að stúlkurnar séu ánægðar með að systkinahópurinn hafi sameinast á ný. Hjördís hefur ekki forræði yfir stúlkunum en flutti engu að síður stúlkurnar frá Danmörku til Íslands frá dönskum föður.

Hún segir að að nú liggi fyrir viðurkenning innanríkisráðuneytisins um ólögmæti þeirra aðgerða íslenskra stjórnvalda og að það verði að skoða dóminn í því ljósi. Hjördís segir að réttur sinn hafi verið virtur að vettugi og ekki gefist tækifæri til að leggja fram ný sönnunargögn í málinu.

„Til samræmis við skýr fyrirmæli laga verða stelpurnar ekki afhentar úr landi nema fyrir atbeina íslenskra stjórnvalda. Þannig þyrfti faðir að fara í nýtt brottnámsmál. Í slíku máli fengi ég tækifæri á því að hljóta áheyrn fyrir íslenskum dómstólum. Ég kvíði því ekki, enda fengi ég þar að leggja fram gögn í málinu og með þeim hætti tryggja hagsmuni barna minna,“ segir Hjördís Svan í tilkynningu.

Faðirinn hefur fullt forræði yfir börnunum en móðirin aðeins umgengnisrétt. Það fyrirkomulag er niðurstaða áralangra forræðisdeilna fyrir dómstólum sem hafa verið afar harðvítugar, ekki síst vegna ásakana konunnar um að maðurinn hafi beitt sig og börnin ofbeldi. Maðurinn neitar þeim ásökunum.