Sannleikurinn: Íslenskir læknar endast ekkert

Landspítalinn hefur hvað eftir annað fengið lélega sendingu af íslenskum læknum til afnota en dæmi eru um að þeir verði úr sér gengnir á innan við ári. Fyrir utan að endast illa þá er ekkert hægt að djöflast í þeim án þess að eiga það á hættu að þeir gefist upp og fari annað.

„Þetta er eiginlega ófremdarástand. Ég veit ekki hvernig ég á að lýsa því öðruvísi. Einu sinni var hægt að láta einn mann vinna vinnu þriggja á einum degi. Maður gat nýtt sama manninn á skurðstofu, deild og með vakt. Þetta eru stöður sem þrír einstaklingar ættu eiginlega að manna en við viljum manna með einum, sem gengið hefur erfiðlega vegna þess að íslenskir læknar hafa engan endingartíma“ segir yfirmaður á spítalanum sem vill ekki koma fram undir nafni.

„Við erum með ömurlegar vinnuaðstæður, alltof mikið álag og því þurfum við ósérhlífna lækna sem láta bjóða sér hvað sem er," bætir hann við. Dæmi er um að nýútskrifaður læknir sé útbrunninn eftir ár í starfi og sækist þá eftir að komast í starf þar sem minna álag er og hærri laun. Oft erlendis.

„Það er okkar reynsla að þeir læknar sem útskrifast eru drasl,“ segir Þorbjörn Jónsson formaður Læknafélags Íslands. Margir íslenskir læknar hafa farið að vinna erlendis eftir hrun þar sem oft er um mun hærri laun að ræða, sveigjanlegri vinnutíma og minna álag. Vilja stjórnendur meina að verið sé að útskrifa íslenska lækna með of hátt sjálfsálit sem gerir það að verkum að íslenska heilbrigðiskerfið geti ekki misnotað þá eins lengi og menn hefðu viljað. Þorbjörn segir þá brenna út á of stuttum tíma en erfiðlega gengur að ná fram meiri sparnaði í heilbrigðiskerfinu ef ekki er hægt að auka álag og þjösnast á þeim læknum sem fyrir eru.



Sannleikurinn rekur öfluga og óvæga fréttastofu þar sem engum er hlíft og ekkert mál er of stórt eða of lítið. Sannleikurinn er háður öllum stjórnmálaflokkum og hagsmunaaðilum. Fréttastofa Sannleikans hefur Facebook-síðu  en vinsamlegast látið hana í friði.