Snjóflóð féll í Ljósavatnsskarði

Snjóflóð féll í Ljósavatnsskarði á Norðurlandi á níunda tímanum í morgun og að sögn vegagerðarinnar var flóðið nokkuð stórt. Vegurinn er lokaður en unnið er að því að ryðja veginn. Enginn var á ferli þegar flóðið féll. Vegurinn um Ólafsfjarðarmúla, Súðavíkuhlíð og Eyrarhlíð er lokaður vegna snjóflóðahættu.

Nokkuð hefur dregið úr vindhraða norðan- og vestanlands í nótt og er veður orðið skaplegra að sögn veðurfræðings á Veðurstofu Íslands. Spáð er hvassviðri í dag víða um land og gæti vindhraði náð allt að 20 metrum á sekúndu víða sunnan- og vestanlands. Dregið hefur úr úrkomu á Norðurlandi og Vestfjörðum og dregur það úr hættu á snjóflóðum.

Almannavarnir lýstu yfir óvissustigi vegna snjóflóða á norðanverðum Vestfjörðum og var reitur 9 á Ísafirði rýmdur. Atvinnuhúsnæði er á reitnum en engin íbúabyggð. Snjósöfnun hefur verið stöðug að undanförnu í hvassri norðanátt og fylgjast almannavarnir náið með snjóflóðahættu á Vestfjörðum og víðar. Ekki er talin vera snjóflóðahætta yfir byggð.

Flestir fjallvegir á Vestfjörðum og Austfjörðum eru ófærir en einnig er ófært um Fróðárheiði. Flateyrarvegur er ófær en gæta þarf sérstakrar varúðar þar vegna snjóflóðahættu.

Hálka er á Sandskeiði , Hellisheiði og í Þrengslum. Hálka er annars víðast hvar á Suðurlandi en þó er flughált í uppsveitum. Hálka eða snjóþekja er á flestum leiðum á Vesturlandi en þó er þungfært á sunnanverðu Snæfellsnesi, ófært er svo á Fróðárheiði og fyrir nes. Á Vatnaleið er þæfingsfærð en  unnið er að hreinsun.

Á Vestfjörðum er ófært um flesta fjallvegi, þungfært er þó á Mikladal og Hálfdán ásamt skafrenningi.

Hálka, snjóþekja eða þæfingur er nokkuð víða á Norðurlandi, ófært er á Víkurskarði og lokað er um Þverárfjall.

Ófært er um flesta fjallvegi á Austurlandi eins og er en unnið er að hreinsun á Fjarðarheiði og Oddskarði. Þæfingsfærð er á Fagradal og Jökuldal.