Hreindýrakvótinn aukinn

Umhverfis- og auðlindaráðherra hefur ákveðið hreindýrakvóta þessa árs að fengnum tillögum frá Umhverfisstofnun. Heimilt verður að veiða allt að 1277 dýr á árinu sem er fjölgun um 48 dýr frá fyrra ári. Þetta kemur fram á vef umhverfisráðuneytisins. Í fyrra var það reyndar svo að erfitt reyndist að ná öllum kvótanum sökum ótíðar.

„Heimildirnar skiptast þannig að leyft verður að veiða alls 657 kýr og 620 tarfa. Veiðin skiptist milli níu veiðisvæða og eru mörk þeirra og fjöldi dýra á hverju svæði tilgreind nánar í auglýsingu sem birtist í Lögbirtingarblaðinu eftir helgi,“ segir á ust.is: „Heimildirnar eru veittar með fyrirvara um að ekki verði verulegar breytingar á stofnstærð fram að veiðum sem kalli á endurskoðun veiðiheimilda.“

Veiðitímabilið stendur frá 1. ágúst til 15. september en þó getur Umhverfisstofnun leyft veiðar á törfum frá 15. júlí sem og lengt veiðitímabil kúa til 20. september.  Veturgamlir tarfar eru friðaðir og miðast því tarfaveiði við tveggja vetra og eldri tarfa. Þá er óheimilt er að veiða kálfa eins og verið hefur undanfarin ár.