Hjördís handtekin og flutt til Danmerkur

Hjördís Svan Aðalheiðardóttir var í dag handtekin og flutt til Danmerkur þar sem hún hefur verið eftirlýst síðan í haust. Í Danmörku bíður hennar ákæra eftir að hún nam börnin sín þrjú á brott og fór með til Íslands.

Samkvæmt heimildum Vísis urðu börn Hjördísar eftir á Íslandi þegar móðir þeirra var handtekin og eru þau nú hjá móðurfjölskyldunni.

Kim Gram Laursen, danskur faðir barnanna, fer með forsjá þeirra samkvæmt úrskurði þarlendra yfirvalda. Hjördís og Kim hafa átt í áralangri forsjárdeilu en danskur dómstóll dæmdi  Kim fulla forsjá í september 2012.

Hjördís mótmælti handtökuskipuninni en hún var staðfest bæði í Héraðsdómi Reykjavíkur og í Hæstarétti Íslands.

Það var Ríkissaksóknari sem fór með málið gegn Hjördísi og eftir úrskurð Hæstaréttar fól hann Ríkislögreglustjóra að hafa samband við dönsk yfirvöld og sjá til þess að handtökuskipanin yrði fullnustuð. Fulltrúar frá dönskum yfirvöldum sóttu svo Hjördísi í dag og fóru með hana til Danmerkur en þar bíður hennar ákæra.