Hreinsuðu undan Porsche Lewandowski

Robert Lewandowski, framherji Dortmund, er ekki vinsælasti maðurinn í Dortmund þó hann raði inn mörkunum fyrir þýska liðið og hafi gert á undanförnum árum. Hann er nefnilega að fara að spila með Bayern München á næsta tímabili og fær mun hærri laun fyrir.

Reiði stuðningsmanna í Dortmund hefur nú brotist út með nokkuð afgerandi hætti því er Lewandowski kom út úr húsi sínu á mánudaginn var búið að stela dekkjaganginum undan bíl hans og stóð hann eftir á músteinum. Bíllinn er ekki af verri gerðinni, Porsche Cayenne GTS sem kostar 70.000 Evrur í Þýskalandi.

Tjón Lewandowski á því að tapa bæði dekkjum  og álfelgum bílsins er um 2.000 Evrur, en að auki þarf að gera við undirvagn bílsins þar sem þjófarnir skemmdu hann með því að hlaða múrsteinum undir hann. Þessi verknaður er ekki beint þakklæti fyrir þau tvö mörk sem framherjinn skæði skoraði fyrir Dortmund um helgina gegn Werder Bremen, er Dortmund vann 5-1.

Lewandowski er líklega orðinn þreyttur á verunni í Dortmund því brotist var inn í hús hans um jólaleitið 2012, áhangendur Dortmund hrópa ókvæðisorðum á hann í leikjum og einn þeirra kærði hann eftir að Lewandowski átti að hafa slegið til hans fyrir utan heimili framherjans. Áhangandinn hafði hrópað til Lewandowski að hann hefði alltof há laun. Áhangandinn dró svo kæruna til baka.

Leiða má líkum að því að Lewandowski bíði í ofvæni eftir vistaskiptunum til München og að þar fá hann meiri frið í einkalífinu.