Hannes fékk risaávísun frá Dominos

Birgir Örn Birgisson, forstjóri Domions Pizza á Íslandi, kom færandi hendi á kynningarfundi fyrir úrslitakeppni Dominos-deildar karla í gær og afhenti Hannesi S. Jónssyni, formanni KKÍ ávísun upp á eina milljón króna.

Framundan er aðaltími ársins í körfunni þegar úrslitakeppnir Dominos-deildar karla og kvenna stela senunni.  

Þessi peningagjöf Domions kemur í viðbót við styrktarsamning fyrirtækisins við KKÍ en báðar efstu deildirnar eru kenndar við Dominos. Þessi milljón á hinsvegar að fara beint í afreksstarfið.  

„Í ljósi þess hversu samstarfið hefur verið gott og gagnlegt fyrir báða aðila vildi Domino's því bæta í og styðja enn frekar við KKÍ og þá afrekstarfið að þessu sinni," segir í fréttinni á heimasíðu KKÍ og peningurinn mun koma sér vel í verkefnum sumarsins en framundan eru landsliðsverkefni og úrvals- og afreksbúðir.