Bílar

Peugeot 308 bíll ársins í Evrópu

Finnur Thorlacius skrifar
Peugeot 308.
Peugeot 308.
Hin virtu verðlaun bíll ársins í Evrópu hlaut hinn franski Peugeot 308 og skákaði 5 öðrum bílum sem komist höfðu í lokavalið. Peugeot 308 hlaut 307 stig, en í öðru sæti varð BMW i3 með 223 stig. Í þriðja sætinu varð svo Tesla Model S með 216 stig, í fjórða Citroën C4, því fimmta Mazda3 með 180 stig og sjötta Skoda Octavia með 172 stig.

Sigur Peugeot 308 var því nokkuð afgerandi því meiri munur var á fyrsta og öðru sæti en öðru og sjötta sæti. Maxime Picat sem fer fyrir Peugeot merkinu sagði við verðlaunaafhendinguna á bílasýningunni í genf að það væri sannarlega gleðiefni að nú væru bílblaðamenn að tala við hann um bíl en ekki en ekki um Peugeot fyrirtækið og dræmt gengi þess á undanliðnum árum.

Þar mælist honum rétt því flestar fréttir undanfarið af franska framleiðandanum hafa verið af taprekstri og erfiðleikum. Vonandi lyftir þessi verðlaunaði bíll Peugeot fyrirtækinu uppúr þeirri lægð sem það hefur verið í. Sala Peugeot bíla hefur minnkað 6 ár í röð og tap hefur verið á rekstri þess síðustu tvö ár.

Peugeot neyddist til að selja kínverska bílaframleiðandanum Dongfeng 14% hlut í fyrirtækinu í síðasta mánuði til að fjármagna reksturinn. Markaðshlutdeild Peugeot minnkaði í 10,9% á síðasta ári frá 11,7% árið áður. Í síðasta mánuði jókst sala Peugeot bíla um 6,9%, svo vonandi er sólin að rísa hjá Peugeot. 

Mest lesið




×

Mest lesið