1-2 metra þykkur ís á mörgum vötnum norðan- og vestanlands

Nú eru ekki nema tvær vikur í að vatnaveiðin hefjist samkvæmt almanaki en útlit er fyrir að mörg vötn verði óveiðanleg eitthvað inní maí vegna íss.

Einstaklega kaldur og langur vetur á þessum slóðum hefur fryst mörg vötnin niður á 1-2 metra dýpi og stundum meira.  Við erum ekki einu sinni að tala um vötn á hálendi heldur þau sem eru inní dölum á inní landi, flest þessara vatna fyrir vestan og norðan eru ennþá ísilögð og sum með 1-2 metra þykkum ís.  Gústaf Gústafsson fór ásamt félögum fyrir stuttu í Vatnsdalsvatn við Súgandafjörð í ísdorg og það tók þá langan tíma að komast í gegnum ísinn sem var um 2 metra þykkur.  Ekki fór mikið fyrir aflabrögðum en nokkrar myndir voru teknar undir ísinn sem sýnir magnað landslag í vetrarríki vatnsins og hægra megin á myndinni sést bleikja synda um ísblokkirnar.  Þessar ísblokkir ná niður á 1-2 metra dýpi og það þarf nokkurn tíma til bræða þennan ís í burtu og gera vötnin veiðanleg.  Líklegast verða vötnin á þessum slóðum ekki klár fyrir veiði fyrr en um miðjan maí.