Flestar bleikjurnar í Varmá mjög vænar

Varmá er yfirleitt talin til skemmtilegra vorveiðiáa og það er synd hvað fáir veiðimenn fara í hana þegar dag tekur að lengja og sumarhlýindin leggjast yfir suðurlandið.

Það er einmitt tíminn sem getur verið bestur í bleikjuna sem lifir í læknum.  Sjóbirtingurinn er að mestu eða öllu leiti farinn úr miðjum maí nema litlir geldfiskar en þess í stað er vert að reyna við stóru bleikjurnar.  Fyrir fáum dögum var mikið af bleikju í Stöðvarhylnum og mest af henni rígvæn.  Þeir veiðimenn sem þá stóðu vaktina fengu fjórar bleikjur en misstu fleiri og þær sem náðust á land voru flestar 4 pund slétt en þó var ein sem náði líklega 6 pundum.  Allar tóku þær litlar púpur andstreymis með töku vara og voru tökurnar frekar grannar.  Bleikjunum var öllum sleppt aftur nema einni.

Vatnaveiðin er í góðum gangi núna og fínar fréttir að berast frá Þingvallavatni, Elliðavatni, Vífilsstaðavatni, Úlfljótsvatni, Selvallavatni og víðar.