Reykjavík hápunkturinn á ferli Ronalds Reagans

Kristján Már Unnarsson skrifar 16. júní 2014 19:30

Leiðtogafundurinn í Reykjavík árið 1986 var hápunkturinn á ferli Ronalds Reagans Bandaríkjaforseta og þar lauk kalda stríðinu. Þetta segir einn helsti samstarfsmaður Reagans í nýútkominni bók sem byggir á trúnaðarskjölum sem nýbúið er að létta leynd af.

Fyrstu viðbrögðin eftir fundinn í Höfða fyrir 28 árum voru vonbrigði, hann virtist hafa misheppnast. Næstu mánuðina á eftir fóru menn hægt og rólega að átta sig á að þar hafði meira gerst en virtist í fyrstu, og eftir því sem árin hafa liðið hefur styrkst sú mynd að fundurinn hafi verið einhver stærsti viðburður í stjórnmálasögu heims á síðari hluta tuttugustu aldar.

„Reagan í Reykjavík” heitir nýjasta bókin, með undirtitlinum: „48 stundir sem luku kalda stríðinu”, en hún kom út vestanhafs í síðasta mánuði. Höfundurinn er Ken Adelman sem var yfirmaður vopnabúrs Bandaríkjanna og einn af ráðgjöfum Reagans á fundinum og hafði áður verið sendiherra hjá Sameinuðu þjóðunum.

Fox-fréttastofan, sem mikið heldur upp á Ronald Reagan, er meðal þeirra sem fjallað hafa um bókina og í grein undir fyrirsögninni „Hvað gerði 1986 fundinn svo sérstakan?” segir höfundurinn að Reykjavíkurfundurinn hafi verið hápunkturinn á ferli Reagans, „his finest hour". Þegar menn skoði þau trúnaðarskjöl sem nýlega sé búið að létta leynd af sjáist að söguleg tímamót urðu í Reykjavík.

Sjónum er meðal annars beint að því nána persónulega sambandi sem náðist milli Reagans og Gorbatsjofs Sovétleiðtoga, sem var lykillinn að víðtækum afleiðingum fundarins.

Viðbrögðin fyrst á eftir voru þó afar misjöfn og vitnað er í Richard Nixon sem sagði að á eftir Jalta-fundinum í lok síðari heimstyrjaldar hefði enginn leiðtogafundur ógnað vestrænum hagsmunum jafn mikið og þessir tveir sólarhringar í Reykjavík.

Þá er vitnað í George Shultz utanríkisráðherra sem spurði Gorbatsjof löngu síðar hver vendipunkturinn hefði verið fyrir lok kaldastríðins. Án þess að hika svaraði Gorbatsjof: Reykjavík.

Tengdar fréttir

Við sýndum hugrekki, visku og ábyrgð

Mikhail Gorbatsjov, fyrrum leiðtogi Sovétríkjanna, kom til landsins í dag. Á morgun, 12 október, eru 20 ár síðan leiðtogafundur hans og Ronald Reagans, fyrrum Bandaríkjaforseta, var haldinn í Höfða. Einkavél Björgólfs Thórs Björgólfssonar forstjóra Novators lenti með Gorbosjov á Reykjavíkurflugvelli um klukkan 16:00. Gorbasjov sagði meðal annars í viðtali sem Þórir Guðmundsson, varafréttastjóri NFS, átti við hann í dag og flutt verður ás NFS í kvöld, að leiðtogafundurinn 12. október 1986 í Reykjavík hafi markað þáttaskil í viðræðum um takmörkun kjarnorkuvopna.

11. október 2006 18:16

Reykjavík verður kvikmynd um sigur mannsandans

Kvikmyndin Reykjavík verður um sigur mannsandans að sögn Mike Newell, sem mun leikstýra þessari stórmynd sem draumasmiðjan ætlar að gera um leiðtogafundinn heimsfræga sem átti sér stað hér á landi árið 1986.

23. nóvember 2012 21:01

Skúrkurinn úr Inglourious Basterds leikur Gorbachev í Reykjavík

Christoph Waltz, sem fékk óskarsverðlunin fyrir að leika nasistaforingja í myndinni Inglourious Basterds mun leika Mikhail Gorbachev, fyrrverandi forseta Sovétríkjanna, í myndinni Reykjavík. Það er Mike Newell sem leikstýrir myndinni, en eins og áður hefur komið fram mun Michael Douglas leika sjálfan Ronald Reagan, fyrrverandi forseta Bandaríkjanna. Eins og fram kemur á vefnum Variety fjallar myndin um leiðtogafundinn í Höfða, sem haldinn var árið 1986 og er oft sagður hafa markað upphafið af endalokum Kalda stríðsins.

15. október 2012 15:24

Kvikmynd um leiðtogafundinn í Höfða í undirbúningi

Framleiðendur í Hollywood eru að undirbúa kvikmynd um leiðtogafundinn í Höfða. Hugmyndir eru um að Warren Beatty leiki Ronald Reagan og Anthony Hopkins leiki Mikael Gorbatsjov. Fulltrúar Clints Eastwoods og breska leikstjórans Ridleys Scott hafa fundað með fulltrúum Reykjavíkurborgar um málið.

31. ágúst 2007 19:20

Mest lesið

Fleiri fréttir