Aðstæður of hættulegar til rannsóknar

Tæknideild lögreglunnar hóf í morgun rannsókn á vettvangi brunans í Skeifunni en þurfti frá að hverfa vegna of hættulegra aðstæðna. Eldvarnir voru augljóslega ekki í lagi í þeim hluta húsanna sem brann illa en eigendurnir fóru þó eftir settum reglum.

Um tvöleytið var ástandið í þvottahúsinu Fönn metið of hættulegt til að halda rannsókn áfram og var ákveðið að burðarbitar húsnæðisins yrðu fjarlægðir áður en lengra verður haldið enda mikil hætta á að þeir gefi sig og hrynji.

 

„Vitum ekkert hvað gerðist”

 Rannsóknarmenn tæknideildarinnar voru mættir klukkan tíu í morgun og fóru yfir ástand þvottahússins Fannar sem er illa brunnið en gengið er út frá því að eldsupptökin séu þar.  Svokallaðir strengjasteypubitar í byggingu hússins hafa hins vegar skapað mikla hætta á hruni.

Lúðvík Eiðsson, stjórnandi tæknideildarinnar sagði á vettvangi í morgun að einblínt væri á Fönn en ekki væri hægt að staðfesta endanlega að þar hefði bruninn kviknað. “Við vitum í raun og veru ekkert hvað gerðist hérna og það verður bara að koma í ljós hvort við finnum eldsupptakastaðinn sjálfan. Ef við finnum hann ekki eigum við mjög erfitt með að svara hvað gerðist hér í raun og veru”, sagði Lúðvík í morgun við fréttastofu Stöðvar 2.

 

Eldvarnir ekki í lagi

Eldvarnareftirlit slökkviliðsins segir eldvarnir augljóslega ekki í lagi í stórum hluta Skeifunnar 11 og reyndar víðar um hverfið. Í mars síðastliðnum skoðaði eftirlitið húsin sem lentu á brunasvæðinu og voru þá smávægilegir ágallar lagfærðir. Eftirlitið gat hins vegar lögum samkvæmt ekki gert sömu kröfur til úrbóta og til nýrri húsa en samkvæmt nýjustu reglum myndu eldvarnir ekki teljast nægar í stórum hluta byggingarinnar. Væri sum húsanna byggð í dag myndu þau ekki standast kröfur um eldvarnir.

 

„Kröfur í dag, lög og reglugerðir eru miklu strangari, það er alveg óhætt að segja það en þetta er allt samkvæmt reglum miðað við samþykktar teikningar hússins”, sagði Ólafur Magnússon, deildarstjóri hjá forvarnardeild Slökkviliðsins sem sinnir eftirlitinu.

Hefði mátt koma í veg fyrir tjón

Húsin á eldsvoðasvæðinu ná yfir um 8000 fermetra og eldurinn náði til tæplega helmings þess. Hins vegar hefði mátt koma í veg fyrir að svo illa færi eins og raunin varð með Víðishúsið sem hefur lagt mikið i eldvarnir og er óskemmt.

Framtíð Griffilshússins er enn óráðin en nokkrir eigendur eru að fasteignunum við Skeifuna ellefu, meðal annars Reitir, Eik og Fönn ehf. Mikill samhjómur þarf því væntanlega að vera á milli eigendanna þegar uppbygging svæðisins verður ákveðin. En samkvæmt aðalskipulagi borgarinnar má einnig byggja þarna íbúðarhús.

Áfram verður unnið að rannsókn eldsvoðans út vikuna og jafnvel lengur.