8 laxar á land í úrhellis rigningu við Ytri Rangá

Þrátt fyrir úrhellisrigningu sem gekk yfir landið mest allt í gær létu veiðimenn það ekki á sig fá og þeir sem gátu veitt árnar sem ekki voru litaðar slitu upp laxa þrátt fyrir aðstæður.

Við bakka Ytri Rangár í gær var gífurleg úrkoma en veiðimenn voru engu að síður að berjast við að koma flugunni út í ánna.  Væntingarvísitalan var þess vegna frekar lág þegar veiði hófst um morguninn en það lagaðist þegar leið á daginn enda voru staðfestir 8 laxar á land um klukkan 18:00 og þá voru þó fjórir tímar eftir af veiðideginum.

Það komu laxar upp úr Djúpós, Ægissíðufossi, Tjarnarbreiðu, 17 1/2, Klöpp og Rangárflúðum. Eitthvað slapp af laxi líka og þykir þetta ágætt miðað við aðstæður og árstíma, allt fallegur tveggja ára lax og allt tekið á flugu.

Eystri Rangá var súkkulaðilituð í gær svo ekki er að vænta talna úr henni en klakveiðinni lauk í vikunni og hefðbundin veiðitími hófst í gær.  Um 40 laxar komu í klakveiðinni og ekki einn smálax var í þeim hóp.